باغپت: کانگریس کی بھارت جوڑو یاترا صبح 6 بجے اتر پردیش کے باغپت سے راہل گاندھی کی قیادت میں دوبارہ شروع ہوئی۔ لوگوں کی بڑی تعداد ہاتھوں میں ترنگا لے کر ان کے ساتھ روانہ ہوئی۔ بھارت جوڑو یاترا کو لے کر حامیوں میں خاص جوش و خروش دیکھا جا رہا ہے۔
اس دوران مغربی یوپی کے کسان پھولوں سے بھری ٹرالی لے کر راہل گاندھی سے ملنے پہنچے۔ کسانوں نے کہا کہ راہل گاندھی یہاں زمین پر نہیں بلکہ پھولوں پر چلیں گے۔ غور طلب ہے کہ آج ‘بھارت جوڑو یاترا’ شروع ہونے سے پہلے لوگوں نے آتش بازی بھی کی۔
خیال رہے کہ بھارت جوڑو یاترا اتر پردیش میں تقریباً تین دن تک رہے گی اور پھر جمعرات کی شام ہریانہ کے پانی پت میں داخل ہو جائے گی۔ اس کے بعد یہ ایک دن ہماچل پردیش سے ہوتے ہوئے پنجاب سے گزرے گی اور پھر جموں و کشمیر میں داخل ہوگی، سری نگر پہنچے پر یاترا کا اختتام ہو جائے گا۔ اب تک راہول گاندھی کی یاترا 10 ریاستوں کے 47 اضلاع کا احاطہ کر چکی ہے اور پیدل 3100 کلومیٹر کا فاصلہ طے کر چکی ہے۔