Published From Aurangabad & Buldhana

پاکستان کے سابق وزیر فواد چوہدری گرفتار، عمران خان پر بھی ہو سکتی ہے کارروائی

اسلام آباد پولیس نے فواد چوہدری کی گرفتاری کی تصدیق کر دی ہے۔ پی ٹی آئی نے خدشہ ظاہر کیا ہے کہ شہباز شریف حکومت جلد عمران خان کو بھی گرفتار کر سکتی ہے

اسلام آباد: پاکستان کے سابق وزیراعظم کی جماعت پی ٹی آئی کے لیڈر اور پاکستان کے سابق وزیر اور پی ٹی آئی کے سینئر رہنما فواد چوہدری کو گرفتار کر لیا گیا ہے۔ ادھر یہ قیاس آرائیاں زور پکڑ گئی ہیں کہ عمران خان بھی جلد گرفتار ہو سکتے ہیں۔ فواد چوہدری کی گرفتاری کے بعد ان کے حامیوں کی بڑی تعداد عمران خان کی رہائش گاہ کے باہر جمع ہو گئی ہے۔

رپورٹ کے مطابق اسلام آباد پولیس نے پاکستان تحریکِ انصاف کے مرکزی رہنما فواد چوہدری کو بدھ کی صبح لاہور سے گرفتار کیا۔ فواد چوہدری کے خلاف الیکشن کمیشن کے سیکریٹری کی مدعیت میں منگل کو اسلام آباد کے تھانہ کوہسار میں مقدمہ درج کیا گیا تھا۔ مذکورہ مقدمے پر کارروائی کرتے ہوئے اسلام آباد پولیس نے فواد چوہدری کو لاہور میں ان کی رہائش گاہ سے حراست میں لے لیا۔

پاکستان کے سابق وزیر فواد چوہدری نے اس سے قبل دعویٰ کیا تھا کہ شہباز شریف کی حکومت سابق وزیراعظم عمران خان کو گرفتار کرنے کا منصوبہ بنا رہی ہے۔ الیکشن کمیشن کے سیکریٹری کی جانب سے درج مقدمے میں فواد چوہدری کے ایک حالیہ بیان کو وجہ بنایا گیا ہے۔ فواد چوہدری نے چند روز قبل میڈیا سے گفتگو کرتے ہوئے کہا تھا کہ الیکشن کمیشن کو خبردار کرتے ہیں کہ اگر زیادتیوں کا سلسلہ جاری رہا تو انہیں اس کی قیمت چکانا پڑے گی۔

مقدمے کے متن میں تحریر ہے کہ فواد چوہدری نے کہا تھا ” الیکشن کمیشن کی حیثیت ایک منشی کی سی ہوگئی ہے اور جو لوگ نگراں حکومت میں لگ رہے ہیں ان کا سزا ہونے تک پیچھا کریں گے۔” فواد چوہدری کے خلاف درج مقدمے میں غداری کی دفعہ 124اے بھی شامل ہے جس کی سزا عمر قید ہے۔

عمران خان کی گرفتاری کے پیش نظر پی ٹی آئی کے حامی ان کی رہائش گاہ کے باہر جمع ہیں۔ پاکستان تحریک انصاف (پی ٹی آئی) کے سربراہ عمران خان کی گرفتاری کی افواہ بدھ کو علی الصبح پھیل گئی تھی۔ لاہور کے زمان پارک میں ان کی رہائش گاہ پر پارٹی رہنماؤں اور کارکنوں کی بڑی تعداد پہنچ گئی۔ پی ٹی آئی رہنماؤں کا الزام ہے کہ پاکستان میں قانون نام کی کوئی چیز باقی نہیں رہی۔

You might also like

Subscribe To Our Newsletter

You have Successfully Subscribed!