لکھنؤ : اتر پردیش کی راجدھانی لکھنؤ سے بڑی خبر سامنے آ رہی ہے۔ یہاں وزیر حسن گنج روڈ پر ایک کثیر منزلہ عمارت گر گئی۔ موصولہ اطلاعات کے مطابق اس عمارت میں 7 خاندان رہتے تھے۔ اس حادثہ کے بعد ملبے سے 3 لاشیں نکال لی گئی ہیں، وہیں کم از کم 20 افراد کے اب بھی دبے ہونے کا خدشہ ہے۔
Uttar Pradesh | Rescue operation underway after a residential building collapsed on Wazir Hasanganj Road in Lucknow
9 people have been rescued so far, said Lucknow DM Surya Pal Gangwar pic.twitter.com/sq0DVr3DLm
— ANI UP/Uttarakhand (@ANINewsUP) January 24, 2023
اس حادثہ کا فوری طور پر نوٹس لیتے ہوئے وزیر اعلیٰ یوگی آدتیہ ناتھ نے ایس ڈی آر ایف اور این ڈی آر ایف کی ٹیمیں موقع پر بھیجنے کی ہدایت دی ہے۔ وزیراعلی کے دفتر کی جانب سے جاری ایک بیان میں کہا گیا ہے کہ وزیراعلی یوگی آدتیہ ناتھ نے ضلع مجسٹریٹ اور سینئر پولیس افسران، ایس ڈی آر ایف، این ڈی آر ایف کی ٹیموں کو جائے حادثہ پر راحت اور بچاؤ کام کرنے کی ہدایت دی ہے۔ کئی اسپتالوں کو بھی الرٹ رہنے کی ہدایت دی گئی ہے۔
فی الحال جائے حادثہ پر ریسکیو آپریشن جاری ہے۔ وہیں ریاست کے نائب وزیر اعلیٰ برجیش پاٹھک بھی صورتحال کا جائزہ لینے کے لے جائے حادثہ پر پہنچ گئے ہیں۔ یہاں انہوں نے میڈیا کو بتایا کہ عمارت اچانک گر گئی۔ 3 لاشیں ملی ہیں اور کچھ زخمیوں کو اسپتال بھیجا گیا ہے۔ این ڈی آر ایف، فائر بریگیڈ کے اہلکار موقع پر موجود ہیں اور بچاؤ آپریشن جاری ہے ۔
برجیش پاٹھک نے یہ بھی بتایا کہ 7 لوگوں کو بے ہوشی کی حالت میں اسپتال بھیجا گیا ہے۔ انہوں نے کہا کہ ابھی ہمارے سامنے چیلنج سبھی کو بچانا ہے۔
دوسری جانب شہری ترقی کے وزیر اے کے شرما نے زلزلے کے جھٹکوں سے عمارت کے گرنے کا امکان ظاہر کرتے ہوئے کہا کہ سبھی ٹیمیں کام کر رہی ہیں۔ این ڈی آر ایف اور ایس ڈی آر ایف کی ٹیمیں بھی راحت اور بچاؤ کے کاموں میں لگی ہوئی ہیں۔