Published From Aurangabad & Buldhana

خانہ کعبہ: صحن مطاف میں طواف کے دائروں کی تعداد 14 سے بڑھا کر 25 کر دی گئی

الریاض: مسجد حرام میں نمازیوں اور معتمرین کی تعداد کو کنٹرول کرنے کی ذمہ دار انتظامیہ کا کہنا ہے کہ صحن مطاف میں طواف کعبہ کے لیے مقرر کردہ ٹریکس کی تعداد 14 سے بڑھا کر 25 کردی گئی ہیں۔ تمام ٹریکس کو دوبارہ ترتیب دیا گیا ہے۔ بزرگ اور خصوصی افراد کے لیے چار ٹریک مختص ہیں۔

مسجد حرام میں نمازیوں کی تعداد اور مجمع کے امور کے ڈائریکٹر جنرل انجینئر اسامہ الحجیلی نے کہا کہ صحن مطاف میں ٹریکس کی تعداد بڑھانے کا مقصد کورونا وبا کے ایس او پیز پر عمل کرتے ہوئے معتمرین کو زیادہ سے زیادہ تعداد میں طواف کی سہولت فراہم کرنا ہے۔ ان کا کہنا تھا کہ جہاں ٹریکس کی تعداد بڑھائی گئی ہے وہیں نمازیوں اور معتمرین کے درمیان سماجی فاصلے میں بھی اضافہ کیا گیا ہے۔

حرمین شریفین میں انتظامی امور کے ادارے کا کہنا ہے کہ ماہ صیام کے موقع پر معتمرین اور نمازیوں کو تمام ضروری سہولیات فراہم کی گئی ہیں۔ انہوں‌نے معتمرین پر زور دیا کہ وہ عمرہ کے اجازت نامہ میں طے شدہ اوقات پر عمل درآمد کو یقینی بنائیں اور طواف اور دیگر مناسک کے لیے اپنے مقررہ وقت پر حاضری یقینی بنائیں۔ وبا سے بچنے کے لیے ایس او پیز کا خیال رکھیں، ماسک پہنیں اور سماجی فاصلہ رکھیں۔

انجینئر الحجیلی نے انکشاف کیا کہ مجمع کو کنٹرول کرنے کے لیے مختص عملے کو صحن مطاف، مطاف کی پہلی منزل، مصلیٰ سنہ الطواف، گراؤنڈ فلور مسعی، شاہ فہد کے دور میں ہونے والی توسیع اور مسجد حرام میں داخل ہونے والے نمازیوں اور معتمرین کے لیے مختص کردہ داخلی دروازوں پر تعینات کیے گئے ہیں۔

(بشکریہ العربیہ ڈاٹ نیٹ)

You might also like

Subscribe To Our Newsletter

You have Successfully Subscribed!