Published From Aurangabad & Buldhana

جنوبی افریقہ کے خلاف ٹی-20 سیریز سے پہلے بھارت کو لگا جھٹکا، کپتان راہل اور کلدیپ باہر

جنوبی افریقہ کے خلاف 9 جون سے بھارت کو 5 میچوں کی ٹی-20 سیریز کھیلنی ہے، لیکن اس سے ٹھیک ایک دن پہلے بھارت ٹیم کو بری خبر ملی ہے۔ اس پوری سیریز سے کپتان کے ایل راہل اور اسپنر کلدیپ یادو باہر ہو گئے ہیں۔ سینئر کھلاڑیوں کی غیر موجودگی میں کپتان بنائے گئے راہل اور کلدیپ دونوں ہی زخمی ہونے کی وجہ سے باہر ہوئے ہیں اور اب دونوں کی بھارت کی ٹیم میں واپسی فٹ نس ثابت کرنے کے بعد ہی ہوگی۔


بی سی سی آئی کی طرف سے دی گئی جانکاری کے مطابق اب ٹی-20 سیریز میں کپتانی کی ذمہ داری وکٹ کیپر بلے باز رشبھ پنت نبھائیں گے، اور نائب کپتان ہاردک پانڈیا کو بنایا گیا ہے۔ کلدیپ یادو کے لیے چوٹ کی وجہ سے باہر ہونا انتہائی مایوس کن ہے کیونکہ آئی پی ایل 2022 میں بہترین کارکردگی کے بعد بھارت کی ٹیم کے لیے وہ پلیئنگ الیون میں شامل ہونے کی پوری امید کر رہے تھے۔

موصولہ اطلاعات کے مطابق کے ایل راہل کو رائٹ گروئن انجری (پیٹ اور جانگھ کے درمیان کا حصہ) ہوئی ہے، جب کہ کلدیپ یادو کے دائیں ہاتھ میں چوٹ لگی ہے۔ اب دونوں ہی کھلاڑیوں کو نیشنل کرکٹ اکادمی بھیجا جائے گا، اور پھر فٹ نس ثابت ہونے کے بعد ٹیم میں واپسی ہوگی۔ ان دونوں کھلاڑیوں کے سیریز سے باہر ہونے کے بعد کسی نئے کھلاڑی کو بھارت اسکواڈ میں شامل نہیں کیا گیا ہے۔ اب دیکھنے والی بات یہ ہوگی کہ 9 جون کو جب جنوبی افریقہ کے خلاف پہلا ٹی-20 میچ کھیلا جائے گا تو بھارت ٹیم کے کن کھلاڑیوں کو فائنل الیون میں حصہ ملتا ہے۔

قومی آوازبیورو

You might also like

Subscribe To Our Newsletter

You have Successfully Subscribed!