Published From Aurangabad & Buldhana

آئی سی سی کی ’وَنڈے ٹیم آف دی ایئر‘ میں محمد سراج نے بنائی جگہ، ٹیم میں شریئس ایر بھی شامل

آئی سی سی نے 24 جنوری کو 2022 کے لیے ’ونڈے ٹیم آف دی ایئر‘ کا اعلان کر دیا ہے۔ اس ٹیم میں ہندوستان کے دو کھلاڑیوں کو شامل کیا گیا ہے۔ مڈل آرڈر کے بلے باز شریئس ایر اور ہندوستان کے نوجوان تیز گیندباز محمد سراج کو آئی سی سی کی اس ٹیم میں جگہ ملی ہے۔ پاکستانی کپتان بابر اعظم کو آئی سی سی نے اس ٹیم کی قیادت سونپی ہے۔ قابل ذکر ہے کہ بابر اعظم کو آئی سی سی کی ٹی-20 ٹیم آف دی ایئر میں جگہ نہیں ملی تھی۔


قابل ذکر ہے کہ گزشتہ سال وَنڈے میں ہندوستان کے لیے شریئس ایر نے بہترین بلے بازی کا مظاہرہ کیا تھا۔ وہ مڈل آرڈر کی جان ثابت ہوئے تھے۔ انھوں نے 17 میچ میں 55.69 کی اوسط سے 724 رن بنائے۔ اس دوران ان کا اسٹرائیک ریٹ 91.52 کا رہا۔ انھوں نے اس درمیان ایک سنچری اور 6 نصف سنچری بھی بنائی تھی۔ جہاں تک محمد سراج کی بات ہے، انھوں نے 2022 میں 15 میچ میں 24 وکٹ لیے۔ انھوں نے اپنی شاندار گیندبازی کی بدولت ہندوستان کی وَنڈے ٹیم میں اپنی جگہ پختہ کرنے میں کامیابی حاصل کر لی ہے۔

اس سے قبل 23 جنوری کو آئی سی سی نے ٹی-20 ٹیم آف دی ایئر کا اعلان کیا گیا تھا۔ اس ٹیم میں ہندوستان کے سب سے زیادہ 3 بلے بازوں کو شامل کیا گیا تھا۔ یہ کھلاڑی ہیں وراٹ کوہلی، سوریہ کمار یادو اور ہاردک پانڈیا۔ بہرحال، آئی سی سی کی ونڈے ٹیم میں ہندوستان کے علاوہ آسٹریلیا، نیوزی لینڈ اور ویسٹ انڈیز کے بھی دو دو کھلاڑیوں کو شامل کیا گیا ہے۔ پاکستان، زمبابوے اور بنگلہ دیش کے ایک ایک کھلاڑی کو جگہ ملی ہے۔

آئی سی سی ونڈے ٹیم آف دی ایئر:
بابر اعظم (کپتان)، ٹریوس ہیڈ، شائی ہوپ، شریئس ایر، ٹام لیتھم (وکٹ کیپر)، سکندر رضا، مہدی حسن میراز، الزاری جوزف، محمد سراج، ٹرینٹ بولٹ، ایڈم زیمپا۔

قومی آوازبیورو

You might also like

Subscribe To Our Newsletter

You have Successfully Subscribed!